في مهنة اسمها "صحفي علمي" دا شخص بيكون صحفي بس متخصص في تغطية الموضوعات والأبحاث العلمية، ودا في الأساس المفترض يكون دارس صحافة ومعاها يكون عارف المنهج العلمي وكيفية قراءة الأبحاث وتقييمها والبحث في المصادر وانواعها وخلافه.
نيجي بقى لتوضيح مهم أوي لازم الكل يبقى عارفه، الصحفي العلمي أو الكاتب والمدون العلمي دول بيندرجوا تحت مجال كبير اوي اسمه "توصيل العلوم - Science Communication"، يعني دول مش باحثين ولا علماء ولا مطلوب منهم انهم يكونوا باحثين او ينشروا ابحاث او يحلوا محل العلماء لأن ببساطة دا دور العلماء والمتخصصين.
الصحفي والكاتب العلمي كل دوره انه ياخد البحث اللي بيتم نشره ويفهمه ويدعبس وراه ويشوف اراء العلماء والمتخصصين ويحاورهم ويلخص الكلام دا بدون ما يقول رأيه وينقله للناس بأمانة.
دا النظام اللي بيحصل في العالم كله وفي أي مؤسسة علمية كبيرة زي نيتشر وساينتفك امريكان ولايف ساينس وغيرهم. مش شرط خالص اللي بيكتبوا علوم يكونوا متخصصين ومعاهم شهادة علمية، وشخصيا اشتغلت تحت ايد محررين كانوا تخصص أدبي كمان في الثانوية ويعتبروا من أفضل وأشطر الناس اللي شغالين في المجال دا.
وبالتالي يا أعزائي، لما حد ينشر موضوع علمي مفيش داعي تزايدوا عليه، لأن كدا احنا بنخلط بين البحث العلمي وبين توصيل العلوم، دا بالإضافة الى إن اللي بيكتب بيطلع عينه بحث ومراجعة ودراسة عشان يفهم اوي الموضوع اللي بيتكلم عنه عشان يقدر يكتبه ومبيقولش فيه رأيه نهائي هو بيستشهد بمصادر وأقوال متخصصين.
لكن فكرة اني ابقى صحفي او كاتب وتقولي ادرس مثلا علوم فيزياء اربع سنين عشان تغطي وتكتب موضوعات عن الفيزياء يبقى ساعتها انا اشتغل باحث علمي احسن مشتغلش صحفي، طبعًا لو حد جامع بين الاتنين انه يكون فاهم صحافة وكمان متخصص في الجزء اللي بيتكلم فيه في العلوم يبقى خير وبركة لكن دا النظام عمومًا في العالم كله مش حاجة جديدة يعني ولا مألفينها.
فياريت نفرق بين البحث العلمي وبين الصحافة العلمية عشان دا مجال ودا مجال تاني خالص.
بالمناسبة لو حد عايز يتعلم صحافة علمية دا كورس عربي حلو جدًا هيساعدكم:
كتب
سعد لطفي
سعد لطفي
0 تعليقات