كتب : الدكتور أحمد أبو النصر
أنا هحكيلكو فى المقال ده قصتى كمريض مع مرض الحموضة المزمنة وإزاى قدرت إتخلص منه نهائيا من ١٣ سنة ولم أصاب به مرة أخرى منذ ذلك الحين بشهر بإستخدام النباتات الطبية .
٢٠٠٦ و أنا بالبكالريوس جاتلى حالة غريبة جدا حموضة مزمنة لاتنقطع ٢٤ ساعة ليل نهار ونهار وليل بلا إنقطاع جننتنى .
فى الوقت ده روحت كشفت عند طبيب باطنى إستاذ فى كلية الطب و كانت الأسئلة اللى سألهالى طبعا بعد الكشف أنت بتشرب سجاير أنا لا أنا متوتر طيب قولتله لا قالى بس أنت شكلك متوتر قولتله لا والله دا أنا حتى بارد عادى يعنى مبزعلش قالى لا أنت متوتر وقام كتبلى رانتيدول بتاع شركة النصر والبوسبار المهدئ طبعا أنا خت حباية البوسبار من هنا ونمت ٣ أيام مع أن المفروض أنه مش منوم بس دا اللى حصل معايا و خدت الرانتيدول فى الفترة دى كنت أخد حباية الرانتيدول تمنع الحموضة لمدة ٨ ساعات . بعد ٨ ساعات ودقيقة ترجع الحموضة أبشع من الأول فضلت على الحال ده أسبوع ورحت للدكتور فى الإستشارة قالى لا لا الظاهر ان التوتر عندك عالى قوى وراح زود جرعة الرانتيدول ل ٣٠٠ بدل ال١٥٠ وكتبلى زولام مهدئ و سيبرالكس كمضاد إكتئاب .
خرجت من العيادة قطعت الروشتة ايه ده ياعم انا لا عندى لا اكتئاب ولاتوتر هيه عافية بتفكرنى بنكتة الدكتور بيقول لأب ابنك تعيش انت رد الولا وقال انا ممتش يابوى قال اسكت يولا انت هتعرف اكتر من الدكتور وطبعا مكملتش الدوا ده ولا الرانتدين لأنهم كانو بيحفظونا فى الكلية إن الرانتدين بيطلع للرجالة لمؤاخذة صدر و ممكن يعمل عقم ومشاكل فى الخصوبة والقدرة .
المهم كان ليا صديق قالى فى دكتور كويس فى المنصورة باطنى روحله المهم روحتله الدكتور قالى بص اللى عندك ده حاجة اسمها الميكروب الحلزونى وطلعلى مجلة علمية بتقول الكلام ده فى الوقت ده وعى الأطباء بجرثومة المعدة كان لسه وكانو لسه مقتنعين بالنظرية القديمة إن التوتر هو السبب الأوحد والتوتر فعلا ياجماعة يعمل حموضة وأنا هشرح العلاقة دى تفصيليا فى مقالات قادمة المهم الراجل بعتنى أعمل التحليل فى معمل البرج ومكنش لسه إلا تحليل الدم أه وطلع متوسط .
متوسط ده حاجة بايخة لا منه إيجابى ولا منه مش موجود المهم الدكتور قال لا انا هكتبلك البروتوكول الثلاثى وساعتها كان لسه لا الهيليكيور ولا بدايله نزلت السوق كتبلى الكلاسيد و الكونترلوك و الفلاجيل مع بعض وعينيك ماتشوف الا النور بقى ضرب عدوى فطرية بسب المضادات الحيوية اللى بنسميها أحنا سوبرفشيال انفكشن أو العدى السطحية نتيجة نقص البكتريا الحميدة .
فى الوقت ده خرجت من عند الدكتور ده بعاهتين مستديمتين الحموضة اللى زادت بعد الأدوية و بقى يكفيك الشر مكنتش بفتحه بشاور وأنا بتكلم .
صحابى كانو زعلانين عليا منهم صديق هخصه بالذكر الله يرحمه راجل علمنى يعنى أيه نباتات طبية الدكتور هشام شومان أخو الشيخ حازم شومان الداعية المحترم المشهور و أنا اتربيت فى بيتهم والناس ناس مخلصين لله وعباقرة .
هشام قالى اسمع يا أحمد الدكتور محمد عامر كان حكى لينا قبل كده إنه كان فى الكويت قبل غزو العراق للكويت بيعملو المستكة اليونانى للخلايجة اللى عندهم حموضة وبيقول ان نتايجها كويسة جرب .
خلى بالك كده عدى عليا شهر فى الحموضة بلا حل فمى باظ معدتى اه مرئ اهين سنانى الله يرحمها جيوبى الأنفية اتففلت وبقت حموضة وصداع ووجع فى السنان والبق وساعت البى بى كمان كان تقولش مية نار من فوق لتحت الدنيا باظت خالص .
روحت إشتريت ٥٠ جرام مستكة قبرصى وطحنتهم وحطيت نص ملعقة صغيرة على كوب زبادى ٣ مرات يوميا بص والله ماعدى ٣ أيام إلا وكان التحسن ٥٠٪ أسبوعين وكل المصايب دى أختفت شهر ومشفتهاش منذ ذلك الحين .
ودى أول عشق وقصة حب حصلت بينى وبين النباتات الطبية ومن ساعتها و أنا قررت إنى أكون منبر وناصح لفوايد النباتات الطبية بشكل محترف .
المهم أول متخرجت روحت عملت دبلومة النباتات الطبية والتداوى بالأعشاب وكان المشرف عليا الدكتور الله يديلو العمر أحمد فؤاد حليم والراجل ده علمنى أداب البحث العلمى وكان راجل ديموقراطى قالى عاوز الرسالة فى ايه قلتله المعدة والنباتات الطبية وحكتله قصتى مع المستكة وقد كان هنمشى مقال مقال بشكل علمى ومبسط فى الكام يوم اللى جاى هنشرح فيه مع بعض المعدة والجهاز الهضمى وعلاقة النباتات الطبية بيها كصدقة جارية عن علم اتعلمته من جهابزة فى هذا المجال .
شير لغيرك خلاصة البوست طبقا للمجلة الإنجليزية للطب الحديث حتى جرام واحد من المستكة يوميا كفيلة انها تخلصك من مشاكل المعدة .
المستكة أمنه لكل الأعمار مشكلتها انها بتتغش عشان غالية أرجوك هات اليونانى أو القبرصى .
المستكة أمنه للحوامل لأن لم يثبت سميتها فى الحمل وبعض المواقع كاتبه عشان مفيش بيانات فالأفضل تجنبها لكن رايى. كمتخصص أمنة وجميلة وفوايدها رهيبة والأمن برضه الزنجبيل والشمر هاتيهم وحطى عليهم ميه سخنة واشرابيهم كشاى أمن جدا رخيص جدا فعال جدا.
دمتم بصحة وعافية وحب ❤️
0 تعليقات