كتب : الدكتور احمد ابو النصر
عاوزك تعرف حاجة مهمة جدا إن صحتكم وصحة عيالكم فوق أى إعتبار مادى مينفعش نجيب لنفسنا المرض بأنواع من خامات الأكل حديثة علينا أصلا لاجسمك يعرفها ولا اتبرمج على إستخدمها و بعدين نرجع نقول المرض جه منين المرض بيجى من قلة
الوعى بالصح من الغلط من توفير بعض الجنيهات اللى فى الأخر بتدفعها للدكاترة ألالاف مؤلفة ودا لو فيه نتيجة أصلا الطبيب فى النهاية بيسعى والشافى هو الله بس العقل بيقول أحمى نفسك و درهم وقاية خير من قنطار علاج .
إرجع كده بالزمن للخلف ٢٠٠ سنة تفتكر ياترى ياهل ترى إيه أنواع السمنة والزيت اللى كانو بيستخدموها جدودنا وأنا جدى الأكبر عاش فوق ال ١٠٠ سنة ومخلعش سنة وهنعرف ليه .
مكنش فيه غير زيت الزيتون اللى كان بيجلنا من فلسطين أو الزيت الحار اللى هوه زيت بذر الكتان اللى مصر طول عمرها كانت معروفة بيه أو زيت السمسم اللى كان بيجلنا من السودان لا حد كان يعرف زيت عباد الشمس ولا زفت الطين المتخلف زيت الصويا أصلها ناقصة استروجين ولا زيت الذرة .
ببساطة قدامك طريقين وأنت بتشترى الزيت ياتجيب زيت ربنا خالق ليك فيه شفا مش بس قصة زيت قلى ولا طبخ زى زيت الزيتون ياتجيب مرض لنفسك ولعيالك قزازة زيت صويا و لا بص هات بقا المصيبة الأعظم زيت القطن ودا بقا يامعلم يبقى إتشاهد على حيوانتك المنوية وانت بتاكل بيه دا عليه دراسات بالهبل فى الموضوع ده مادة الجوسيبول القاتلة للحيونات المنوية ودا طبعا الراعى الرسمى لمحلات الطعمية فى مصر لا وكمان والله مابيغيروه فى الطاسة بيزودوه بس ونرجع نقول المرض جاى منين ماهو من القرف ده .
وسؤال مهم جدا هو أنا ممكن أقلى بزيت الزيتون هنرد ونقول أه بس إشترى زيت الزيتون البكر الإكسترا اللى هوه معصور ع البارد ومصفى extra virgin olive oil لان النقطة بتاعته اللى بيها بيعمل دخان عالية جدا تتراوح من ٢٠٠ ل ٢١٠ درجة سليزيوس ودى عالية جدا قريبة من الذرة و عباد الشمس .
فيه إجماع من المتابعين إن إستخدام زيت الزيتون ممتاز ولكن على مستوى السيد نجيب سويرس ولذلك وجب علينا إيجاد حل .
والله عنيا مأمأة عشان أقدر أوصل لشئ يكون عليه دراسات حقيقة بأمان أحد الزيوت اللى ممكن تستخدم فى القلى والطبخ ولكن فى البداية لازم تعرف ليه أنا بكره زيت عباد الشمس والذرة والصويا شوف مشكلتى مع الزيوت دى إن فيهم نوع من الأحماض الدهنية إسمه أوميجا ٦ وأوميجا ٦ ده مشكلته إن بيعمل إلتهاب بالشرايين فبيضطر الكبد أسفا إن يرفع الكولسترول الضار عشان يروح يعمل إصلاح للشريان التالف و بعدين شوية شوية ينسد الشريان بسبب تراكم الكولسترول عليه .والله أنت ونصيبك بقا فى الشريان اللى اتصاب لو دماغك يبقى ألف مبروك الشلل لو قلبك يبقى اتخرب بيتك فى الدعامة أو لاقدر الله قصور الشرايين التاجية يخلص على عضلة القلب و يعمل فشل فيها .
عشان تقدر تتخلص من الأثار السيئة للأوميجا ٦ دى مين بيعمل كده ؟؟؟؟ أوميجا ٩ وحبيب بابا دا فين فى زيت الزيتون قلنا غالى مين تانى أوميجا ٣ ودا فين مممم دا فى زيت السمك وزيت بذر الكتان وزيت السمك أفضل وهبقا أشرح الموضوع ده تفصيليا فى المستقبل إن شاء الله .
أما زيت الصويا وزيت القطن أنا بكرهم أساسا دول بيلعبو فى عداد الخصوبة فدول خارجين من الحسبة .
البديل هوه زيت النخيل بس دا قصة ولازم تعرف أبعادها كاملة .
أولا النخلة اللى بطلع منها زيت النخيل غير النخلة اللى بتطلع التمر و الرطب والبلح اللى بناكله نوع تانى خالص
بس عامة أنا بحب النخيل عامة بأنواعه و منتجاته ومؤمن زى ماكتابت فى المقال الأول بأكل ما أكله أجدادنا من ٥٠٠٠ سنة الناس كانت بتعصر ثمرة النخيل وتطلع منها الزيت من الثمرة اسمه زيت النخيل و بيعصرو البذرة وبيطلع زيت بذر النخيل .
زيت النخيل بيطلع منه منتجين المنتج الأولانى هوه الأولين اللى هوه الزيت بتاع الطبخ والتانى هوه اللى شبه السمنة اللى هوه الاستيارين اللى بيتعمل منه السمنة النباتى الغير مهدرجة وهعمل بوست مفصل للسمنة .
فاكرين زمان نزل زيت تموين والناس محبتوش لأنه فصل زيت فوق وحتة متجمدة تحت دا كان زيت نخيل وهوه صحى بالمناسبة .
فى النهاية المفروض طبقا للدراسات الحديثة ان نسبة الدهون المشبعة فأكلك لا تتعدى ١٠٪ من السعرات الحرارية اليومية ونسبة الدهون المشبعة فى زيت الأولين ٤٥٪ يعنى انت لو سعراتك ٣٠٠٠ سعر حرارى فى اليوم يبقى معاك ٣٠٠ سعر حرارى منهم دهون مشبعة .يعنى ليك حتى ٤ ملاعق كبيرة من زيت الأولين فى اليوم بدون قلق ان شاء الله .
ابعد تماما عن أى منتج ركز معايا معمول من زيت بذرة النخيل لأن دهونه المشبعة فوق ال ٨٠٪ وهات منتجات زيت النخيل اللى هوه الأولين .
نااس كتير تسمع عن الأوميجا٣ إنه مفيد لمرضى القلب والشرايين والأعصاب لكن متعرفش تفاصيله فى البوست ده هنكتب تفصيليا القصة .
الأوميجا ٣ حمض دهنى موجود بشكلين فى الدنيا النباتى زى الموجود ببذر الكتان والحيوانى زى الموجود بزيت السمك زى اللى موجود بالمكاريل الأنشوجة السلامون الساردين والتونة .
جسمك بيستخدم مباشرة الأوميجا ٣ الحيوانى زى زيت السمك طبعا ولو أنت خدت النباتى الجسم لازم يحوله الأول قبل مايستخدمه وعشان كده الأفضل إنك تاخد السمكى مباشرة وعشان كده وأنت بتشترى الاوميجا ٣ ركز جدااا فى المصدر اللى جاى منه ولكن إن لم يكن متاح ليك زيت السمك هات زيت بذر الكتان مفيش مشكلة واسمه بمصر الزيت الحار .
والوقتى فيه مصانع بتعمل تقنية حديثة لتجفيف الزيوت وتحولها لبودرة ودى تقنية حديثة جدا .
أيه الفوايد اللى إتنشر عنها دراسات فى الأوميجا ٣ :
٥٣٧ دراسة ب ٨٤ تأثير طيب على الجسم و ٣٣٨ مرض منشور عنهم دراسات ومنها :
١- الإلتهاب عامة ٣٥ دراسة زى إلتهاب المفاصل القولون الأعصاب إلى أخره .
٢- السكر النوع التانى ١٣ دراسة .
٣- مشاكل القلب و الأوعية الدموية ١٣ دراسة وتحديدا مشاكل الشرايين التاجية ٩ دراسات .
٤- الإضطراب ثنائى القطب ١٠ دراسات .
٥- الإكتئاب ١٣ دراسة .
٦- التذبذب القلبى الأذينى ١٤ دراسة .
٧- خرف الشيخوخة ١١ دراسة .
٨- ضغط الدم المرتفع ٩ دراسات .
٩- التوحد ٦ دراسات .
١٠- الكبد الدهنى ٤ دراسات والربو الشعبى ٦ دراسات .
طبعا دا إختصار لعدد الأبحاث اللى اتعملت عن فوايد الأوميجا ٣ على الصحة العامة وخلينا نقول حكمة ليس كل الدهون شر
فيها والله خيرالشر فى السكر اللى ملوش فايدة مش فى السمنة والزيت .
ندخل على الشق التانى من موضوع السمنة والزيت الجزء الخاص بالسمنة والزيت الفيتامينات الذوابة بالدهن .
مبدأيا الفيتامينات نوعين الفيتامينات الدوابة فى الدهون و الفيتامينات الدوابة فى الماء .
الفيتامينات الدوابة فى الدهن بيتجمعو فى كلمة اكده الصعيدية أو كداه الفرفرافيرى المهم احفظهم بالطريقة اللى تناسبك ألف كاف دال هاء .
بستعجب اوى امال لاقى واحد بيشرب اللبن خالى الدسم يعنى عاوز ابقا اقوله دى الفايدة فى كريمة اللبن ياعم الدسم أو القشطة أو الكريمة هيه اللى شايله فيتامين العظم فيتامين د.
هظلم فيتامين د لو حصرت دوره فى البوست ده لأنه ليس فيتامين أكتر من دوره كهرمون و فوايده لا تعد و لاتحصى .
يكفى ان أقولك ان من غيره لا الكالسيوم بتاع القلب ولا الماغنسيوم بتاع العضلات ولا الزنك بتاع المناعة و الهرمونات هيمتصو ولو امتصو هيبقى كلام فاضى لأن فيتامين د بيرفع الإمتصاص ٢٠ ضعف .
فيتامين دال يعنى عظمة قوية يعنى درس قوى يقطم الحديد .
فيتامين دال يعنى جلد سليم بدون صدفية ولا إكزيما ولا ذئبة .
فيتامين دال يعنى وقاية من الجلطات .
فيتامين دال يعنى مفاصل بلا خشونة ولا روماتويد .
والله محتاجين ليه ١٠٠ مقال المهم محدش يضحك عليك ويبعلك لبن خالى الدسم .
فيتامين كاف :
دا لوحده قصة عندنا كاف واحد اللى بيمنع الدم انه يسيل وكاف ٢ الجميل اللى بيمنع التكلس فى اللحم بيمنع الكالسيوم يترسب باللحم فيعمل حصوة بالكلى ولا المرارة ولا حتى تصلب الشرايين .
التوصيات بتقول اما تحب تاخد فيتامين د خد معاه كاف ٢ وكاف ٢ مش أى نوع النوع المستخلص من الناتو اليابانى ام كى ٧ دا مش اسم رشاش ام كى ٧ دا اسم فيتامين ك ٢ الجميل .
فيتامين هاء :
حبيب الجلد و الكبد دا بيخلى كبدك بلا دهون وبيودى الدهون على جلدك فيكون جلدك دايما رطب و جميل وناعم زى الأطفال كده وملمسه ناعمة وقوية وكلها حنية و كبدك بلا دهون وجسمك بلا سكر .
فيتامين ألف: ودا الألفا بتاع العين وبعدين دا كمان بيزود إنتاج البروجسترون للسيدات اللى عندهم متلازمة النفق الرسغى اللى هوه بيصيب عدد هائل من السيدات وعند الرجالة بيمنع العقم .
دول من غير دهون فى أكلك مش موجودين
يعنى أصل الدكتور قالى لازم ابعد عن الدهون فى أكلى ردينا وقلنا ليس كل الدهون شر من غير الدهون يبقى مفيش الفوايد دى خالص طيب دول موجودين فين.
فيتامين الف قطعة كبدة البقرى بتديك ٧١٣٪ من حاجتك المطلوبة يوميا .
١٠٠ جرام رنجة فيها تخيل ١٦٢٨ وحدة فيتامين د تخيلو .
١٠٠ جرام سبانخ فيها ٤٠٢٪ من اللى محتاجهم الجسم من فيتامين كاف .
ملعقة كبيرة من زيت جنين القمح فيها ١٣٥٪ من حاجة الجسم من فيتامين هاء وده بيفسر ليه دا بالذات للبشرة والشعر جبار .
مش عارف انت ممكن تعمل الأكلة الخرافية دى ازاى بس لو شوحت الكبده بزيت الأولين بالمناسبة غنى هوه كمان بفيتامين هاء ولا زبده مع السبانخ والكبده و قطعة رنجة وعليهم ملعقة زيت جنين القمح و بما ان مناجم الحديد الاتنين موجودين بالمرة السبانخ والكبده ضيف ليمونة عشان فيتامين سى بيزود امتصاص الحديد يبقى اقولك دى أكلت الهنا بالمناسبة الصاروخ ده كيتو .ومتنساش تضيف ثومة وزنجييلة .
0 تعليقات