كتب: الدكتور أحمد أبو النصر
عندك فى نهاية المرئ عضلة فى مكان التقاء المعدة بالمرئ العضلة بنسميها صمام والصمام ده شبه السكس بالف بتاع السخان وظيفته ان الأكل ينزل المعدة ميرجعش تانى زى مالسكس بالف أو صمام الأمان وظيفته ان الميه السخنة بتاعت السخان تمشى فى اتجاه واحد لو ارتخى صمام المعدة هترجع مكونات المعدة ع المرئ الغلبان بالظبط زى ماتكون فى الحمام تيجى تفتح الحنفية بتاعت الميه الباردة ينزلك ميه سخنة موحوحة نار .
دا سبب حرقة الصدر نار ياحبيبى نار ارتجاع الأكل والحمض وممكن كمان معاهم الصفرا بتاعت الكبد ع المرئ بيولعه نار ايه اللى بيخلى صمام المعدة يرتخى اكتب معايا :
١- هرمون البروجسترون اللى موجود بأقراص منع الحمل واللى بيطلع عند الست فى النص التانى من الدورة الشهرية .
٢- الكافيين اللى موجود بالقهوة والشاى .
٣- الدواء موسع الشعب الهوائية اللى اسمه ثيوفيللين .
٤- الأكلات الدسمة .
٥- الشيكولاته .
٦- المشروبات الكحولية .
٧- التدخين .
٨- أدوية ضغط الدم والمهدئات وموسعات الشرايين التاجية .
٩- خل التفاح والحوامض زى الليمون والبرتقال .
١٠- فيتامين سى .
جميل فيه حد بقا بيعكس القصة دى وبيقبض الصمام ده ويقفل بالضبة والمفتاح لحسن الكل عنده إرتجاع .
١- القرنفل .
٢- الزنجبيل .
٣- البنجر .
٤- بيكربونات الصوديم .
٥- نبات جميل أوى وطعمه رائع أوى اسمه حصا اللبان أو الروزمارى .
٦- اللحمة والهبر (البروتين )
جرب كده لو عندك ارتجاع تشرب الشاى العشبى الجبار ذو الطعم الرائع ده ربع ملعقة صغيرة من الزنجبيل مع ربع ملعقة صغيرة من القرنفل وضع عليهم كوب ماء ساخن ويشرب ٣ مرات يوميا قبل الوجبات ياباشا .
شير لغيرك الغلابة مرضى الضغط أجمعين و المدخنين والستات فى النص التانى من الدورة كلهم عندهم ارتجاع دا مشروب لازم يكون بكل بيت , وهنا هتلاقي أفضل النباتات لعلاج ضعف عضلات المعدة.
دمتم بصحة ❤️
0 تعليقات